ھەڵوێستی ئێران و تورکیا نەگۆڕەو تا ئیستا لەگەڵ ئەنجامدانی ریفراندۆم نین لە ھەرێمی کوردستان، نوێنەری حکومەتی ھەرێمیش لە تاران رایگەیاند، ئێران و تورکیا بە دوای رێگا چارسەرێکدا دەگەڕێن بۆ ئەنجام نەدان یاخود دواخستنی ریفراندۆم.
"نازم عومەر" نوێنەری حکومەتی ھەرێم لە تاران بەکوردسات نیوزی راگەیاند، راپرسی بۆ سەربەخۆیی ئەرکێکی پیرۆزی ھەموو کەسێکی نیشتمانپەروەرە لە کوردستان، بەڵام کاتی ریفراندۆمەکەو ھەڵوێستی وڵاتانی دەوروبەرو جیھان لەسەر ئەو پرسە، دواخستنی ریفراندۆمە لەو وادەیەی دیاریکراوەو کاتەکەی بەگونجاو نازانرێت.
"نازم عومەر" راشیگەیاند، کۆماری ئیسلامی ئیران و تورکیاش یەکێکن لەو وڵاتانەی ھەمیشە باس لە پاراستنی یەکپارچەیی خاکی عێراق دەکەن، ھەروەھا جەخت لەوەش دەکەنەوە مافە رەواکانی گەلی کورد لە چوارچێوەی دەستوری ھەمیشەیی عێراقدا جێبەجێ بکرێت، لەبەرئەوە ھەڵوێستی ئەو وڵاتانە ھەڵوێستێکی نەگۆڕە لەسەر ئەنجام نەدانی ریفراندۆم لەو وادەیەی دیاریکراوە.