امروز: هەینی 19 نیسان 2024 برابر با 19 نیسان 2024

نازم دەباغ: ئێران رێوشوێنەکانی عێراقی بۆ کۆنتڕۆڵکردنی سنوور پێباشە

رووداو دیجیتاڵ 
 
نوێنەری حکومەتی هەرێمی کوردستان لە ئێران رایگەیاند، ئێران ئەو کارانەی عێراق بە هاوئاهەنگی هەرێمی کوردستان دەیانکات بۆ پاراستنی سنوورەکان پێباشە و بە پێویستی دەزانێت. دەشڵێت: "ئەو رێوشوێنانەی دەگیرێنەبەر بە رەزامەندی ئێران دەکرێت؛ ئێران پێیوایە لە بەغدا سیاسەت و پڕەنسیپێک بۆ رێگەگرتن لە چالاکییەکانی دژ بە ئەو هەیە."
 
رۆژی دووشەممە 12-12-2022، نازم دەباغ، نوێنەری حکومەتی هەرێمی کوردستان لە کۆماری ئیسلامیی ئێران لەبارەی رێوشوێنەکانی عێراق لە پاراستنی سنوور و دامەزراندنی چەند لیوایەک بۆ ئەو مەبەستە بە تۆڕی میدیایی رووداوی راگەیاند: "هەر رێوشوێن و هەڵوێستێکی حکومەتی عێراقی وەریبگرێت پەیوەندیی بە سنووری هاوبەشی نێوان ئێران و عێراق بە هەرێمی کوردستانەوە هەبێت، بەبێ رەزامەندی و هاوئاهەنگی لەگەڵ کۆماری ئیسلامیی ئێران ناکرێت و ئەو کارە سەرناگرێت."
 
نازم دەباغ دەشڵێت: "بەدڵنیاییەوە ئەو بڕیار و رێوشوێنانەی عێراق دەیانگرێتەبەر بەبێ رەزامەندی ئێران ناکرێت و کۆنتڕۆڵکردنی سنوورەکان لەلایەن عێراقەوە بەهاوئاهانگی هەرێمی کوردستان لەگەڵ ئێران گەرەنتی دەدات بە ئێران."
 
نوێنەری حکومەتی هەرێمی کوردستان لە ئێران لەبارەی راوەستانی ئەو هێرش و بۆردومانانەی کە ئێران زوو زوو دەیکردن، گوتی، "بەدڵنیاییەوە ئەگەر کۆماری ئیسلامیی ئێران ئێستا چالاکییەکانی راگرتووە پەیوەندیی بە بەرپەرچدانەوەی ئەو کارانەوە هەیە لە سنوورەکان و لە ناو کۆماری ئیسلامیی ئێران روودەدەن."
 
نازم دەباغ پێیوایە، عێراق بڕیارێک نادات ئەگەر دڵنیایی و گەرەنتی لە ئێران وەرنەگرێت، چونکە ئێران پێیوایە لە بەغدا ئەو سیاسەت و پرەنسیپە هەیە کە رێگە لەو چالاکیانە بگرن کە کاریگەریی لەسەر ئاسایش و سەقامگیریی ناو ئێرانەوە هەیە، بۆیە بە رێوشوێنەکانی عێراق دڵخۆشە و پێیباشە.
 
لە دوای ناڕەزایەتییەکانی نێوخۆی ئێران و رۆژهەڵاتی کوردستان، رۆژی 28-9-2022، ئێران بە درۆن و مووشەک هێرشی کردە سەر بارەگای حیزبەکانی رۆژهەڵاتی کوردستان و کەمپی پەنابەرانی رۆژهەڵات لە باشووری کوردستان، بەو هۆیەوە 17 کەس گیانیان لەدەستدا و زیاتر لە 50 کەسیش بریندار بوون. دواتر سێ جاری دیکە بە درۆن و مووشەک هێرشی کردەوە سەر هێزەکانی رۆژهەڵات لە کۆیە، زڕگوێز، شێراوە و کەمپی جێژنیکان لە بەحرکە.
 
بەرپرسانی ئێران، هێزەکانی رۆژهەڵات بە هەڕەشە بۆ سەر خۆیان دەزانن، بۆیە چەندینجار داوایان لە هەرێمی کوردستان و عێراق کردووە، ئەو هێزانە لە چەک دابماڵن.
 
https://www.rudaw.net/sorani/middleeast/iraq/121220228
Read کد خبر: 930

دوایین هەواڵ

راپۆڕتەکانی پڕ بینەر

حالت های رنگی