نوێنەرێ حکومەتا هەرێمێ ل ئێرانێ راگەهاند، بەرسڤا حکومەتا ئێرانێ دەربارێ هەناردەکرنا نەفتا هەرێمێ ب رێکا بۆریان ل وی ولاتی ئیجابی بوو.

"نازم دەباغ" نوێنەرێ حکومەتا هەرێمێ ل ئێرانێ د بەرنامێ تاوتۆیێ ئێن ئار تى راگەهاند "حکومەتا ئێرانێ داخوازکریە، کو هەرێم بەرسڤێ بدەت کا کی راکێشانا بۆریان دئێختە ستویێ خۆ و رێ و جهێن شاندنا نەفتێ دێ چاوا بن، بەلێ ژبەر ئەڤ رەوشا دەڤەرێ کار لسەر جێبەجێکرنا وی پرۆژەی نەهاتیە کرن".

گوت ژى "ئەو رێکا نها نەفتا هەرێمێ تێدا بۆ ئێران دچیت رێکەکا هوور نینە و ئەگەر شاندنا نەفتێ ب بۆریان بیت وی دەمی دێ هەمی هژمار شەفاف و ئاشکرابن".

نوێنەرێ حکومەتا هەرێمێ ل ئێرانێ ئاماژە ب وێ ئێکێ ژى کر، "دگەل بەرپرسەکێ حکومەتا تورکیا کۆمبوویمە، من گوتیێ کو پرۆژەیێ شاندنا نەفتا هەرێمێ ب رێکا بوریان بۆ ئێرانێ یێ منە، بەلێ ئەز ناخوازم پرۆژێ ئابوریێ هەوە سست بکەم، تنێ دخوازم وەک کورد بژاردەیێن مە یێن ئابورى زێدەتربن و هەیا ژبەر ئێک بژاردە ریبریی هێرشان نەبین".

حکومەتا هەرێمێ دگەل حکومەتا ئێرانێ دەربارێ هەناردەکرنا نەفتا هەرێمێ ب رێکا ئێرانێ یاداشتەکا لێکتێگەهشتنێ هەیە، بەلێ هەیا نها لسەر وێ چەندێ رێکنەکەفتنە کو حسابا وێ نەفتێ دئێخنە سەر کێ و ئێران ب چەندێ دفرۆشیت.