به بۆنه‌ی ٤٠ه‌مین ساڵیادی دامه‌زراندنی یه‌کێتی نیشتمانیی کوردستان به‌رگی یه‌که‌می "مێژووی یه‌کێتیی نیشتمانیی کوردستان" که باس له رووداوه‌کانی ساڵانی ١٩٧٥ و ١٩٧٦ ده‌کات له لایه‌ن ناوه‌ندی چاپ و بڵاوکردنه‌وه‌ی "دات" له تارانی پێته‌ختی ئێران له‌چاپ دراوه و که‌وته به‌ردیدی خوێنه‌ران.
"سامان سلێمانی" وه‌رگێڕی ئه‌م کتێبه که پێشتریش کتێبی "سه‌رۆک کۆماری پێشمه‌رگه"ی وه‌کوو به‌شێک له بیروه‌رییه‌کانی جه‌نابی "مام جه‌لال" به زمانی فارسی بڵاوکردۆته‌وه له وتووێژێکی تایبه‌تدا پێی راگه‌یاندین: ئه‌م کتێبه له ٤ به‌شی سه‌ره‌کیی پێکهاتووه، به‌شی یه‌که‌می له‌ژێرناوی "بارودۆخی سیاسی، ئابووری و کۆمه‌ڵایه‌تی باشووری کوردستان له ساڵی ١٩٧٥"، باس له هۆکاره‌کانی شکستی شۆڕشی ئه‌یلول و کاریگه‌ری ئه‌م شکسته له‌سه‌ر کۆمه‌ڵگای کوردستان ده‌کات، به‌شی دووه‌می کتێبه‌که "قۆناغی دوای شکستی ١٩٧٥ و سه‌رهه‌ڵدانی بزووتنه‌وه‌یه‌کی نوێ له مێژووی کورد"دا باس ده‌کات که دامه‌زراندنی یه‌کێتی و پێکهاته‌کانی و به‌رنامه‌و پلانی یه‌کێتی و ئامانجه سیاسی و ستراتیژه نه‌ته‌وه‌ییه‌کانی یه‌کێتی باس ده‌کات.
به‌شی سێهه‌می ئه‌م کتێبه باس له "ده‌ستپێکردنی شۆڕشی نوێ ده‌کات له ساڵی ١٩٧٦" و تیایدا قۆناغه‌کانی ئه‌م به‌شه گرنگه له مێژووی یه‌کێتی باس ده‌کات، له به‌شی چواره‌میشیدا باس له "په‌یوه‌ندییه‌کانی یه‌کێتی له ناوخۆ و ده‌ره‌وه‌ی کوردستان" له‌وانه: هێزه کوردستانییه‌کان، هێزه ئۆپۆزسیۆنه‌کانی عیراق، بزووتنه‌وه ئازادیخوازه‌کانی ناوچه، حکومه‌ته‌کانی ناوچه‌که و زلهێزه جیهانییه‌کان باس ده‌کات.
"سامان سلێمانی" هه‌روه‌ها رایگه‌یاند: ئه‌م کتێبه ٤ پاشکۆی تایبه‌تیشی له‌خۆگرتووه، پاشکۆی یه‌که‌م "به‌یانی دامه‌زراندنی یه‌کێتییه"، پاشکۆی دووه‌م "نامه‌یه‌کی مێژوویی جه‌نابی مام جه‌لال‌ه که له ساڵی ١٩٧٦ بۆ به‌ڕیزان ئیدریس بارزانی و مه‌سعوود بارزانی نوسیوه"، پاشکۆی سێهه‌م "نامه‌یه‌کی دیکه‌ی مام جه‌لال‌ه که بۆ عه‌لی عه‌بدوڵڵای نوسیوه" و پاشکۆی چواره‌م "ئه‌و بیره‌وه‌رییانه‌ی مام جه‌لال‌ه که له ١/٦/٢٠١٢ به بۆنه‌ی ٣٧ه‌مین ساڵیادی دامه‌زراندنی یه‌کێتی له ته‌له‌ڤزیۆنی گه‌لی کوردستان بڵاوکرایه‌وه" و بۆ یه‌که‌مجار دامبه‌زاندووه و دوای وه‌رگێڕانی به زمانی فارسی له‌م کتێبه‌دا بڵاوم کردۆته‌وه.
"سامان سلێمانی" سه‌باره‌ت به گرنگیی وه‌رگێڕانی ئه‌م کتێبه رایگه‌یاند: ئێران وڵاتێکی خاوه‌ن هێزه له ناوچه‌که‌دا و کاریگه‌ری له‌سه‌ر رووداوه‌کان هه‌یه‌و ده‌توانێت هه‌یبێت، زۆر گرنگه که مێژووی که‌سایه‌تی و رێکخراوه سیاسییه‌کانی کوردستان به خوێنه‌رانی بناسێنرێت و ئه‌وه‌ی تا ئێستاکه هه‌بووه ته‌نها له چوارچێوه‌ی ده‌زگا حکومییه‌کاندا بووه، زۆر گرنگه ئه‌م بابه‌تانه بهێنرێته ناو بواری راگه‌یاندن و چاپه‌مه‌نییه‌وه و هه‌ر له‌م روانگه‌وه "مێژووی یه‌کێتی نیشتمنایی کوردستان" که خاوه‌ن گۆڕانکاری گه‌وره و چاره‌نوسسازه له عیراق و کوردستاندا گرنگ بوو خوێنه‌ری فارس لێی ئاگادار بێت، له‌م پێناوه‌شدا پرۆژه‌یه‌کمان به هاوکاری مه‌کته‌بی راگه‌یاندن و مه‌کته‌بی په‌یوه‌ندییه‌کانی یه‌کێتی ده‌ست پێکرد و تا ئێستا دوو کتێب له‌م پرۆژه‌یه‌دا بڵاوکراوه‌ته‌وه و درێژه‌شی ده‌بێت، کتێبی یه‌که‌م "ژیاننامه‌ی جه‌نابی مام جه‌لال" بوو که پێشوازییه‌کی زۆر باشی لێوه‌کراوه و ئه‌مه‌ش کتێبی دووه‌مه که به شێوه‌ی شیکاریی باس له "مێژووی ی.ن.ک و چۆنیه‌تی و هۆکاره‌کانی دامه‌زراندنی" ده‌کات.
جێگای ئاماژه‌یه که ئه‌م کتێبه له ٢٧٠ لاپه‌ڕه و به نرخی ٢١ هه‌زار تمه‌نی ئیرانیی بڵاوکراوه‌ته‌وه.