نازم دەباغ، لە میانەی بەشداریكردنی لە بەرنامەی (رووداوی ئەمڕۆ)ی رادیۆ و تەلەڤزیۆنی (رووداو) باسی كارەكانی نوێنەرایەتی حكومەتی هەرێمی كوردستانی لە تاران كرد و گوتی "تاوەكو ئێستا ئەو باڵەخانەیەی نوێنەرایەتییەكەی تێدایە بەناوی منە و بەناوی حكومەتی كوردستانەوە نییە".
دەربارەی دانپێدانانی حكومەتی عێراقیش بەو نوێنەرایەتییە گوتی "د.رۆژ نووری شاوەیس، جێگری سەرۆك وەزیرانی عێراق سەردانی كردووین ئەمەش دانپێدانانە، بەڵام هوشیار زێباری وەك وەزیری دەرەوە سەردانی نەكردووین".
نازم دەباغ باسی كەسایەتی قاسم سولەیمانی، فەرماندەی سوپای قودسی كرد و گوتی "كەسێكە لە پاسدارێكی سادەوە خۆی پێگەیاندووە و هەمیشە دۆستی كورد بووە". هەروەها گوتی "دوایینجار كە سولەیمانی سەردانی هەرێمی كوردستانی كردووە، لە هەولێر دابەزیوە".
سەبارەت بە كۆبوونەوەیەكی نێوان سولەیمانی و كەسی یەكەمی نێو پارتێكی ئیسلامی كە لەناو فڕۆكەدا لە فڕۆكەخانەی هەولێر كراوە، گوتی "ئەمە بە سوتفە بووە".
نوێنەری حكومەتی هەرێمی كوردستان باسی ئەوەشی كرد كە لە نێوان ئەوان و حكومەتی ئێراندا نامەكاری فەرمیش هەیە و بۆ نموونە پسوولەی خەرجی كارەبا بە فەرمی لەلایەن وەزارەتی كارەبای ئێرانەوە بە ناونیشانی نوێنەرایەتی حكومەتی هەرێمی كوردستان بە دەستیان دەگات.